Labuh Ai Mata Gaga

Aku ada tahun 1981 ba menua Lemanak, Engkilili, daerah Lubok Antu, bahagian Sri Aman. Empat menyadi, tiga indu serta aku aja siku laki lalu menyadi ke paling biak. Apai udah nadai lebuh udah abis pom lima tang lebuh ke agi idup sigi udah lama enda begulai enggau kami menyadi, sarak enggau indai aku lebuh aku agi bedau sekula primary. Pandak ke cerita, indai aku meh ke nupi kami berempat sekula. Diatu, iya ke tuai nyadi cikgu, dua iku agi nya surirumah serta aku ke baru udah abis sekula.

Ngenang ke penusah iya nyekula ke kami ka beraie belama asai ya, sinu agi enti iya ngenang sigi enda berasai ai mata aku labuh. Belalai selalu iya enti ka nyabak enggai mantai ke diri ba mua iya. Bakani ka nupi empat iku anak? Mutung getah, nanam lada serta bumai nya meh penatai pemisi. Ngering ni meh tulang ke udah tuai, maiuh ni tik ulih dikereja iya siku? Getah kelia ukai berega baka ke diatu. Lebuh kami agi mit, garam serta sayur babas tauka ditanam diri empu nya meh ke selalu agi diempa tudah indai, nyimat ke duit enda ibuh bebeli ke pemakai baka orang bukai, pama meh bisi gak dibai anak nurun sekula. Tang enti bangat nadai, ka pan enda ngutang duit orang dulu meh. Mua tik malu sigi nyau nyadi tebal.

Sekula aku tik keterubah iya ba S.R.K. Ridan tahun 1988 sampai tahun 1993. Nadai sekula tadika baka ke diatu. Diau ba asrama, dua minggu sekali baru pulai. Penyauh sekula ari rumah panjai kami enka semak dua jam bejalai kaki. Dua ringgit dibai nurun sekula dikena pengelama dua minggu nya. Kekadang nemu gak berunding, bejual ke buah baka buah rian tik ulih ba sekula agi sama anembiak ke sama sekula dia (tiga tauka lima puluh sen sigi enti orang ka meli), laban maiuh diri gak pun rian ngerimbai sekula. Limau tuan ke selalu agi dibai ari rumah nyampau diri gak ulih (sepuluh sen sesirap). Pama meh, ulih gak nya kena meli ruti kayu balak tik berega sepuluh sen sebungkus. Nya ke selalu agi dibeli laban nya ke paling murah selain ari ruti kulum berega sepuluh sen dua igi. Enda ibuh ke bekasut, beselipar nadai meh ke selalu agi. Endang selalu meh telih ensiban tetebak ke duri, kerimpak kaca serta paku lawang laban ke endang manchal bemain kin kia. Sepengingat aku, sigi nadai kala indai aku datai jari nyipat ngemedis enti bisi ngereja pengawa tik enda dikemendar. Gaga diri gak madah nya, tang ba sekula, burit, jari, belakang endang selalu lita disipat, pending dipulas cikgu laban manchal kekadang kelalu. Sekula enda pandai laban agi bedau nemu berunding ke pengidup dudi hari. Pass ke enda masuk pom satu meh kenu ko jaku. Panjai amai dicerita, sigi rindu enti ngenang maia agi mandi telanjai sbebelah ai, berakit, ngelantar ba tanah liat. Betanchut enda cukup laju ngelantar menyadi. Enka nya besangkut enggau aerodinamik kini.

Tahun 1994, singkang baru ba bup pengidup. Aku masuk sekula pom satu ba S.M.K. Lubok Antu, Lubok Antu. Bisi mimit gak beduit, laban rumah panjai kami bisi dilawa tourist. Upah dikena ngambi serta nganjung tourist ngena mutu ai ba pengkalan ba Sebeliau (Ili rumah panjai kami tik datai jalai alun alai tourist ngetu, ari Kuching), serta pengawa baka nyabung, nyumpit, berapi, betabuh, ngajat serta bejalai ke kampung. Mai sepuluh ringgit laban dikena bebeli ke reban baka pen, pensil, bub, yuran serta tambang bas pulai mansang. Umbas gak nya, ulih gak bekasut, enti nadai, beselipar pama meh. Laban ke bidik, aku bisi nerima Biasiswa Persekutuan Kecil penyampau tiga ratus setahun (diterima sampai pom lima). Agi diau ba asrama dua minggu sekali pulai. Tahun 1997 masuk pom empat ba S.M.K. Datuk Patinggi Kedit, Betong. Nadai maiuh berubah, semina duit belanja niki gik laban ke mar agi gak kos sekula, mai dua puluh ringgit dikena dua minggu. Selalu iya belaluh, kurang mimit gak dibai nurun sekula sekali agi laban ke bisi simpan mimit. Maya tuk udah nemu nyimpan duit dalam ASB. Bebendar mimit gak sekula tang dipeda agi bedau cukup, SPM tahun 1998 bulih pangkat dua. Merening agi bedau jauh, dipikir selalu tang enda digaga’ ke selalu agi. Nyesal nadai guna tang gaga’ nya dikena nyadi tungkat penyesal, tungkat kena bediri, dikena nyingkang laban tuk ukai bandir pengidup, ukai pengujung besekula.

Laban ke pandak runding ngasai ke diri enda ulih masuk universiti, sigi nadai enggau orang bepinta. Suba universiti ukai maiuh, enda senang dimasuk baka ke diatu. Bagu meh maya nya, ni meh nemu nasib bisi kini. Taja pia, pengeran ati ka besekula endang agi bisi tang bepikir pasal duit, nganti dulu meh. Laban ke agi bedau nyambung sekula, aku kerja kontrak enggau orang ngaga engkelebat ba jalai alun tik benung digaga orang mansa rumah panjai kami (Jalai Engkari). Digaji tokey lapan belas ringgit sehari, maiuh amai meh nya asai ya. Kerja enam hari seminggu, hari minggu baru off. Udah terima berasai gaga amai, ulih gak ngejung pasar Engkilili makai mi cina, bemain snooker amai pan indai, menyadi enda ngasuh, manchal agi bedau lenyau. Bisi udah beberapa bulan kerja kontrak, bisi mimit gak duit, aku agi Kuching. Aku belajar computer, khusus Microsoft office’s laban ngasai ke computer benung nyadi buah jaku amai gak maya nya. Udah abis belajar computer, bisi meh sebulan dua kini aku kerja nyadi bartender ba Hotel Crown Plaza, Kuching. Terima gaji laban ke nitih penguntung hotel, bisi gak semak enam ratus sebulan. Betambah gak duit disimpan ba bank. Ujung tahun 1999 aku naban ke diri agi Kuala Lumpur.

Beberapa minggu udah datai ba Kuala Lumpur aku kerja part-time waiter ba Hotel Dynasty. Kerja start pukul 6 pagi sampai tengahari, tang selalu iya overtime sampai manager ngasuh pulai. Bisi gak lapan ratus gaji ulih sebulan enti maiuh overtime. Udah kerja setengah tahun aku nyadi bartender laban baru bisi vacancy, permanent. Nyauka semak setahun nadai sekula, aku ngambi sijil Majlis Latihan Vokasional Kebangsaan (MLVK) ba Pusat Elektronik Wilayah , sijil juruelektrik phasa satu enggau phasa dua tahun 2000 sampai tahun 2002. Amai pan aku belajar baru, aku enda ngelengka ke pengawa kerja ba hotel laban kelas aku malam aja. Duit lebih dikena aku meli motosikal second-hand RXZ tahun 2001. Nyamai agi gak ka mindah kelebih agi sekula tauka kerja. Pengudah abis ngambi sijil, ditu ati aku bepampang dua, ka ngambi chargeman tauka engineer?

Ngasai kediri ka kerja bebaju manah diau ba opis kenu ko juluk ati, aku nyambung ba International University College of Technology Twintech (IUCTT) ba Sri Damansara ngambi khusus BTec Higher National Diploma (Hons) in Electrical Electronics Engineering. Khusus nya program besapit enggau University of Wales Newport (UWN), United Kingdom serta diiktiraf perintah. Pinjau diberi MARA, tiga puluh ribu lebih sepemanjai khusus berasai amai gak lempung mimit pasal duit. Ditambah agi, aku agi kerja, kerja malam enam hari seminggu jam 5 sampai12 malam. Belajar ngambi diploma tuk ngasuh aku bebendar amai belajar amai pan aku kerja. Sigi nadai maiuh jam ka bejalai kin kia ba Kuala Lumpur amai pan bisi motosikal dikena mindah laban ke jam sigi suntuk, pukul 7 pagi nurun ke sekula selalu iya kelas start pukul 8 pagi, pulai sekula kerja gak lemai sampai tengah malam. Kemaya jam aku belajar deh pengudah pulai ari sekula?

Nurun kerja laban ke selalu agi dalam bar, aku semampai bebai ke bup. Kerja enggau belajar meh aku ba hotel nya, enti lebuh enda busy ulih gak sekejap sekejap meda bup ngaga kerja rumah tauka ulangkaji. Kekadang tinggal enda digaga kerja sampai bos nganu. Jaku anu endang selalu tang aku ke liat ati enda ninga, kerja anang ngaga kerja sekula ko iya. Nyau suah nganu tang aku enda mending ngasuh bos nyau enda ibuh udah nya enti aku meda bup laban kerja selalu iya manah digaga aku. Setahun udah kerja tetap aku lalu ditiki pangkat. Abis kerja pukul 12 malam aku enda pulai terus ke rumah, selalu iya belelak dulu ba kedai makai semak rumah laban kerja agi bedau abis dia, agi bedau. Udah tembu makai malam lebih kurang pukul 1 pagi aku pulai ke rumah. Ukai terus tinduk, aku belajar sampai pukul 3 pagi. Laban ngasai ke sehari hari lelak, takut ke ngantuk tetinduk aku selalu ngaga sejug kopi o awak ke ulih nyengkang mata pengelama 2 jam, pama meh. Jamban endang sigi bau kemik ai kopi.Utai tuk nyau nyadi routine pengelama aku belajar dia.

January 2005 aku graduated, yeay. BTec Higher National Diploma (Hons) in Electrical Electronics Engineering enggau CGPA 3.42 diulih. Amai pan ngasai ke aku ulih bulih manah agi result laban bisi masalah technical ba siti subject, dipadah ke lecturer bulih ‘Distinction’ tang ba transkrip ditulis ‘Merit’. Dipadah penanggul nya tang ujung ujung lecturer madah kertas enda temu, iya minta ampun enda ulih nulung amai pan nya silap iya. Enda ngawa lah utai enda ulih putar agi. Udah mujur meh diploma aku, berasai lantang ati.

Labuh ai mata gaga.

Agi ka nyambung sekula. Udah nya aku minta belajar ba United Kingdom laban diploma (HND) dipelajar ngena British standard, enka senang agi ko asai ati serta pandak agi masa belajar. Bulih kangau ari tiga iti universiti. Aku ka nyambung ba Staffordshire University, Stafford, England laban universiti nya betempat ba country side, sunyi ari ingar bandar besai. Sebedau mupuk ke England aku kerja nyadi technician ba Cheras, Kuala Lumpur.

Maiuh agensi/jabatan perintah tauka kompeni ke bisi nganjung anembiak sekula agi oversea dipinta ngiga belanja besekula kin tang maiuh amai udah nadai ulih meri tauka dibeku tahun nya. Minta study loan Jabatan Perhidmatan Awam (JPA), nasib manah bulih! Maya nya tahun 2005 perintah (MARA) nadai ngeluar ke biasiswa agi pelajar oversea, udah abis belajar bayar meh nya. Enda ngawa, future investment munyi ko orang putih. Tang study loan ke diberi nya semina ulih nampung tuition fee aja. Bakani ke belanja pengidup deh? Minta loan ari bank nya cara ke pengujung iya tang ngemaiuh ni meh ulih pinjau enti nadai reta ke dicagar baka rumah, rumah panjai ukai nya ka nyadi dicagar deh. Nasib ipar aku nulung ba nya, rumah iya dicagar. Tun Jugah Foundation bisi meh dipinta tang sida semina ulih meri lima ratus ringgit aja. Ngemaiuh ni meh nya ulih nampung belanja? Budget duit bisi kena setahun pama meh. Laban ke liat ati, enda ngawa lah, ila aku kerja gak datai din. Nyamai amai meh enti anak orang kaya, ukai madah berasai kesal diada ke bilik enda bepengeraja. Enti sigi ka endang sigi ulih mansang ke mua, ka ya betungkat tauka ngerayap.

Enka udah tauk diengkah ke tisi penanggul duit maya tuk kenu ko ati. Udah nya utai ke penudi iya patut digaga ianya ngaga student visa. Aku enda ulih ngaga student visa nya tumu laban sebedau nya agi bedau temu aku bisi ke enda duit dikena belajar, nyadi, sebulan nyauka mupuk kin baru aku minta amai pan duit agi bedau ulih dikeluar bank (September sekula start ba UK tang bank ulih ngeluar duit dalam masa tiga bulan, loan approved in august). Laban bdau cukup duit dalam bank, aku minjau bank statement kawan aku awak ke nulung bukti duit, dipadah aku tuk diri sebilik ba surat akuan, dikena apply student visa. Berasai amai irau ati aku, dua minggu nyau ka terebai agi gak bedau bulih visa. Maiuh amai orang tik besangkaut paut digiga ditanya aku tang sida madah enda ulih nulung laban nya british empu orang ke ngaga nya. Pengujung iya aku madah ke British ambassador ba Malaysia penanggul aku ngena email. Nasib meh diberkat petara, beberapa hari udah nya secretary iya nyaut aku, pagila tauk diambi dik visa nya. Gaga meh amai, nyadi meh aku belajar agi UK. Begaut meh aku beradu besedia ke utai tik deka dibai dalam masa beberapa hari.

Labuh ai mata gaga.

September 2005, musim bungai larah, autumn, aku datai ba England, United Kingdom tauka nyamai agi disebut ‘UK’. Sungai Lan ko niang aki aku. Nasib gak maya nya agi bedau entu chelap. Agi nakal gak keluar tang ngena baju chelap ke siti aja dibeli aku ba menua mula-mula ya. Nyamai diri gak menua orang, tusah amai ka bepeluh, aruh orang putih jarang mandi amai pan sida ba Malaysia, udah teleba bakanya. Main bol nadai meh keluar peluh amai pan ka luput belanda begagai ke buah bol kin kia. Enti enda bepeluh ni bisi bau, gari pan sama mega alah meh kamah laban tanah tauka aruk. Gari endang sigi jarang dibasu enti enda kamah, pama meh nyimat ke belanja agi laundry. Basu bayar, ngerangkai bayar meh nya. Ukai alah dibasu enggau jari, dijembi ba luar maya musim chelap ukai ka rangkai. Aruh mega orang putih bekasut dalam rumah, kaki chelap amai amai pan heater dipasang ba rumah. Rumah orang sigi bercarpet, tang bisi gak dapur tauka bilik mandi enda.

Rumah nyamai endar gak endur diau disedia ke universiti, semi-d tiga iti bilik, tiga iku student. Jauh diri gak enti nurun agi kelas, laban ke chelap berasai endar 15 minit. Udah bebeli ke basikal jampat agi gak datai, asai ke mansang mit baru bebasikal. Lain gak menua orang. Laban ke suntuk belanja, selalu ya sekali sehari aku makai, makai malam. Pagi makai bread tauka cereal, tengahari enda tentu. Ok gak enti udah biasa, orang indu jarang meh makai enti diet. Lebuh ke setahun udah datai din aku enda kerja laban duit endang bisi dikena (udah bisi budget enda kerja setahun, focus enggau cara orang belajar dulu enggai ke enda ulih catch up). Gari baru ke dibeli jarang amai bisi. Belajar enggau bebendar aja meh kerja aku, lapar tat ke aja. Lelengau enda ibuh kira, nadai iban enggau bekaban bejaku betunga mua. Ukai nya sama asai ya enti betelepon. Telepon legi enda meh aku entu nemu bejaku, sigi enda landik bejaku ba telepon. Selalu amai aku ngarap ke anembiak bansa dayak, iban kelebih agi datai belajar betemu enggau aku awak ke bisi kaling bejaku iban betunga mua tang lalu aku nadai kala benasib enda tetemu ke sida. Enda patut nadai tang maia nya aku enda bidik. Enti bisi penusah ninggang sigi ka nyabak belama meh asai ya, bisi gak lebuh iya ai mata bekeberai enda alah tagang. Kapa ka sayau ke ai mata, nyamai agi enti udah nyabak.

Julai 2006 aku graduated BEng in Electrical Engineering. First class degree with honours!

Labuh ai mata gaga.

Udah setahun ba UK, baru aku bulih kerja part-time, tusah diri ngiga pengawa enti bedau kala kerja din maya nya. Maiuh macam pengawa kala dikereja aku enggai ke putus belanja laban aku nemu duit belanja nyau ka abis diguna laban mula-mula nya kerja bisi baru orang ngangau kerja. Nuci jamban, bilik office, ngumpul sampah ba stadium, kerja catering, nyadi bartender/waiter ba tempat lumba kuda serta tempat orang kawin. Nyau berasai nyamai agi gak pengudah aku bulih kerja tetap hari malam sampai dinihari ba supermarket udah nya baru bulih kerja siang enti nadai kelas. Maiuh anembiak sekula ka nuci jamban begiga ke duit belanja sekula? Mula mula berasai malu serta keji mimit gak nuci taik nuci kemik orang tang tat ke aja meh, duit gak bisi datai ari nya. Umbas gak duit nya dikena belanja, lebih nya dikena meli utai serta bejalai meda menua. Cuti musim panas aku diau ba Leeds enggau kaban aku dia, ngica ke dia maiuh agi kerja ulih digaga dipinta. Selalu iya, aku terpaksa kerja lebih jam ari ya ke dikemendar perintah agi anembiak sekula ba UK. Limit 20 jam seminggu. Udah abis cuti panas aku pulai baru ke Stafford laban ka nyambung master. Kerja part-time terus digaga ba Stafford.

Penanggul beberapa kali laban student visa aku semina diberi dua tahun aja. Baka ke diatur mula-mula, sepatut ya aku ngambi Master of Electrical engineering. Ketegal ngambi Master Science of Electrical Engineering, aku mesti ngemaru ke baru beberapa kali. Penanggul ngemaru ke student visa tuk ukai semina mayar mata duit lima ratus pound sterling (lebih kurang RM 3 000.00) fee aja tang bukti duit mesti cukup dikena enam bulan, dipelaba ke tiga ribu pound sterling (lebih kurang RM 18 000.00). Dini meh aku bisi duit ngemaiuh nya amai pan aku kerja part-time, enda ibuh tanya kami sebilik ba menua, nadai kami ngemaiuh duit nyampau nya. Kaban aku ke sama sekula ke beduit nya meh endur aku minta tolong. Tiga bulan sebedau ngemaru visa, duit nya mesti bisi dalam bank account atas nama aku laban lebuh nganjung pom ngemaru ke student visa, tiga bulan bank statement certified tauka original copy dikeluar ke bank mesti ka diseretai ke awak ke orang nemu aku bisi duit amai pan kebendar iya aku nadai. Nasib meh orang pecaya ke aku, ngibun duit sida ngemaiuh nya ngelama tiga bulan lebih. Endang sigi malu serta takut meh tudah aku, nebal kediri meh mua, nya gak siti aja jalai.

September 2006 aku nyambung ngambi Master Science of Electrical Engineering. Laban duit ke diberi JPA semina ulih mayar yuran Master of Electrical Engineering, duit yuran nya ditambah enggau duit aku empu tik diulih ari kerja part-time. Berasai endar enti ditukar mata duit Ringgit Malaysia. Tang enda ngawa, kada ke bisi peluang nyambung sekula ke tinggi agi (penemu aku nukar khusus nya disukung ari bala professor ke ngajar aku). Nibuh ke nyambung PHD nya amai pan aku ulih pengelepas result tik manah maya degree, aku ulih ngambi PHD terus tang duit siti penanggul. Mayar Master Science nya pan udah ngeradai. Ba UK, ‘Master’ tuk dikategori undergraduate, ‘Master Science’ tuk postgraduate. Maya belajar Master Science aku agi kerja part-time. Maya tuk aku kerja pukul 10 malam sampai 6 pagi. Enti bisi kelas tumu, pulai kerja lalu lanjur nurun ke sekula. Pulai kelas lemai ulih gak tinduk sekejap sebedau ke nganti maya jam deka nurun kerja baru.

December 2008 aku abis Master Science tang konvo July 2009 laban konvo semina tiap July setiap tahun. Amai pan result aku enda sama manah baka ke lebuh ngambi degree (first class degree with honours), aku tetap bepuas hati. Kerja tik berat serta maiuh overtime laban ke begiga duit belanja lalu mimit masa belajar endang pengaruh tik besai dalam sekula. Tang berkat ari petara sekali agi, mujur meh Master Science aku.

Labuh ai mata gaga.

Kemaiuh penusah tik ninggang udah dicerita aku ditu, semina siti aja penguji ari petara tik enda ulih dikunsi aku laban nya kelalu personal serta paling senang ngasuh ai mata sinu labuh. Tang aku tetap beterima kasih agi petara laban pemujur tik udah diberi iya ngelama tuk. Amen.

Explore posts in the same categories: Uncategorized